World Education Connect Multidisciplinary e-Publication, Vol. VI, Issue I (January 2026), pp,679-698
Alvin keneth G. Yco
Introduksiyon
Ang pagtuturo ay isang sistematikong proseso ng pagbabahagi ng kaalaman, kasanayan, at pagpapahalaga na hindi lamang nagaganap sa loob ng silid-aralan kundi maging sa iba’t ibang kapaligiran. Sa asignaturang Filipino, mahalaga ang papel nito sa paghubog ng kasanayan sa pagbasa, pagsusulat, pakikinig, at pagsasalita, pati na rin sa pagpapalalim ng pagpapahalaga sa sariling wika at kultura. Sa ilalim ng MATATAG Kurikulum, layunin ng edukasyon na mapaunlad ang karunungan at kakayahan ng mga mag-aaral upang maging handa sa hamon ng globalisasyon habang pinananatili ang pambansang identidad.
Dahil sa kakulangan ng kagamitang pampagtuturo sa Filipino 7 sa ilalim ng MATATAG Kurikulum, nilikha ng mananaliksik ang interaktibong modyul na pinamagatang “DIMAGIBA – Sandigan ng Karunungan: Interaktibong Modyul sa Pagkatuto at Pagtuturo ng MATATAG Kurikulum sa Filipino 7.” Layunin ng modyul na ito na mapadali at mapahusay ang pagtuturo at pagkatuto sa pamamagitan ng makabago at interaktibong pamamaraan, gamit ang teknolohiya na angkop sa interes at kakayahan ng mga mag-aaral.
Ang interaktibong modyul ay dinisenyo upang palawakin ang kaalaman ng mga mag-aaral, paunlarin ang kanilang kritikal na pag-iisip, at palalimin ang pag-unawa sa wika, panitikan, at kulturang Filipino. Nagsisilbi rin itong gabay ng mga guro sa mas epektibong paghahatid ng aralin. Ginamit sa pagbuo ng modyul ang Katobee Author, isang offline at user-friendly na aplikasyon na hindi nangangailangan ng internet, kaya naging praktikal lalo na sa panahon ng pandemya.
Sa kabuuan, napatunayang ang interaktibong modyul ay isang mabisang kagamitang pampagtuturo at pampagkatuto na nagdudulot ng mas malinaw na pag-unawa, mas mataas na interes, at mas ganap na pagkatuto ng mga mag-aaral sa Filipino 7 sa ilalim ng MATATAG Kurikulum.
https://doi.org/10.65494/pinagpalapublishing.123
